अशीही आणि तशीही

जन्म देता देता जन्म घेणारी
शब्द नि अर्थ जुळवणारी

उंचच उंच गर्दीमध्ये
बोट घट्ट धरणारी

चिंचा, बोरं, भोवरे, चेंडू
गिरगिर, भिरभिर.. खुलणारी

कधी रुजली हे न कळताही
अंगोपांग बहरणारी

कधी अंग चोरून बसणारी
नको असतानाही असणारी

काही आयुष्यभर दिसत, भासत
हुलकावणी देत राहणारी

उणे अधिक मांडता मांडता
हातचा म्हणून राहणारी

अन् ती.. आभाळागत सदैव जागी
फक्त नजरेत सामावणारी

जगणं-बिगणं सुरू असता
'का? कशासाठी?' हे सांगणारी

उतरणीला लागत असता अंधूक झाल्या नजरेपुढे
पुन्हा एकदा उजळत जाऊन विरामाकडे नेणारी

...नाती!

(पूर्वप्रकाशित)