संक्षीप्तानुभव

मिपाच्या काही सदस्यांशी नुकत्याच गप्पा झाल्या. मिपावर येणारे जिलब्यापाडू धागे, धोधो येणारी खल्लास विडंबनं, नवलेखकांचा नवखा उत्साह, स्वतःची मतंच खरी मानणारे, ती दामटणारे काही सदस्य असं सगळंच त्यात आलं.
मग पुढे लेखन कसं हवं, कसं नको, प्रतिक्रिया कशा द्याव्या, कशा नसाव्या हेदेखील. या निमित्ताने पटणाऱ्या, न पटणाऱ्या बऱ्याच गोष्टींची उजळणी झाली.
या सगळ्या उचापतीचा सारांश म्हणून हे जिलबीचं ताट.. हे ताट भरायला हातभार लावणाऱ्या इतर बल्लवांचेही आभार.
...
मिसळपावच्या दुनियेमध्ये आहेत काही सदस्य
त्यांच्यापैकी एकांचे काही कळेना हे रहस्य

न लागू दे टोटल तरी धागे तू काढावे
गरज असो नसो भले प्रतिसादही द्यावे

चर्चा होईल वादळी, परि अर्थ? .. शून्य.
झाला नाही उपयोग तरी तू मात्र धन्य.

म ची बाराखडी आहे विशेष प्रिय तुला
सदा तुझा घोष सुरू - मी.. माझे.. मला.

नसलेल्या मुद्यावर शब्दाळल्या भाषी
एकुलत्या एका संदर्भावर लिही लिही लिहिशी

बघता बघता जमून येते वाचकांची गर्दी
४०, ५०, ६० प्रतिसाद.. होत राहते भरती

धाग्यावरती आल्यावर चालवायची शाब्दिक कात्री
एकेकट्या सदस्याशी मात्र करायची असते मैत्री

तुझ्या मताविना वेगळे असूच नये काही
दरवेळी हाच हट्ट..? असं बरं नाही.

ऎकवले कोणी चार शब्द की खट्टू होते मन
आपलंच असं का होतं हे बघायचं नाही पण

गाणं, कविता, अध्यात्म, असो कोणताही 'विषय'
सग्गळ्यातलं सग्गळं तुलाच कळतं. खरंच का रे ...असंय?

(पूर्वप्रकाशित)